ભારત સરહદે અતિ આધુનિકઅણુ મિસાઈલો ગોઠવતું ચીન

ચીન ગુપ્ત રીતે પોતાની લશ્કરી તાકાત વધારી રહ્યું છે. તેણે ભારત સાથેની સરહદો પર નવા અત્યાધુનિક લાંબી રેન્જના ભજીજી-૫ મિસાઈલો ગોઠવ્યાં છે અને આ વિસ્તારમાં ટુંકી મુદ્દતે એરબોર્ન દળોને ફેરવવાની તાકીદની યોજનાઓ વિકસાવી છે. ચીને ૧૫૦૦ કિ.મી. રેન્જના એન્ટિશિપ મિસાઈલો વિકસાવ્યા છે, જે એરક્રાફ્રટ કેરિયર્સને ફટકો મારી શકે છે, તેમ પેન્ટાગોનના અહેવાલે જણાવ્યું છે.

પેન્ટાગોનના અહેવાલ મુજબ ચીને ૧,૫૦૦ કિ.મી.ની રેન્જ ધરાવતી એન્ટિશિપ અને એન્ટિ એરક્રાફટ મિસાઈલ બનાવી

અમેરિકાના સંરક્ષણ વિભાગ પેન્ટાગોને કોંગ્રેસ સમક્ષના અહેવાલમાં જણાવ્યું હતું કે ભારત અને ચીન વચ્ચે રાજકીય અને આર્થિક સંબંધોમાં વૃદ્ધિ થઇ હોવા છતાં બન્ને વચ્ચેની સરહદોએ તંગદિલીમાં વધારો થયો છે અને ચીનના સૈનિકો દ્વારા સીમાભંગ અને આક્રમક સરહદ પેટ્રોલિંગની ઘટનાઓ વધી રહી છે. જોકે, ચીન-ભારત સરહદે લશ્કરી ક્ષમતાઓમાં કોઇ અસંગત વધારો જોવા મળ્યો નહિ હોવાનું પેન્ટાગોન અહેવાલે જણાવ્યું હતું.
પોતાના વાર્ષિક અહેવાલમાં યુએસ સંરક્ષણ વિભાગે જણાવ્યું છે કે પ્રાદેશિક અવરોધકોને સુધારવા માટે પીપલ્સ લિબરેશન આર્મીએ ભારત સાથેની સરહદો પર જૂના, પ્રવાહી બળતણ ધરાવતા અને અણુક્ષમતા સાથેના ભભજી-૩ ઈન્ટરમીડીએટ રેન્જના મિસાઈલોના સ્થાને વધુ આધુનિક અને સર્વાઈવેબલ ભજીજી-૫ મિડીયમ રેન્જ બેલેસ્ટિક મિસાઈલ્સ ગોઠવ્યાં છે. ચીન અત્યારે તેની ભારત સાથેન સરહદોએ વ્યાપક માર્ગ અને રેલવે ઇન્ફ્રાસ્ટ્રકચર વિકાસ કાર્યક્રમ હાથ ધરેલો છે. ભારત સાથે ૪૦૫૭ કિલોમીટરની સરહદ પર મુખ્યત્વે અરુણાચલ પ્રદેશનો વિવાદ તંગદિલીપૂર્ણ છે, જેને ચીન તિબેટનો એક હિસ્સો જ ગણે છે અને તેથી પોતાનો પ્રદેશ ગણાવે છે. તિબેટી મેદાન પ્રદેશના પશ્ચિમ છેડે અકસાઈ ચીન વિસ્તારને પણ તે પોતાનો પ્રદેશ ગણાવે છે.

ભારત અને ચીન બન્નેએ ૨૦૦૯માં પોતાના દાવાઓ મજબૂત બનાવવાના પ્રયાસો વધારી દીધાં હતાં. ચીને એશિયન ડેવલપમેન્ટ બેન્ક પાસેથી ભારતને મળનારી ૨.૯ અબજ ડોલરની લોન અટકાવવા પ્રયાસ કર્યા હતા. આ લોનનો હિસ્સો અરુણાચલમાં જળયોજનાઓ પાછળ વપરાશે તેવું કારણ રજૂ કરાયું હતું. ચીનના લશ્કરી ખર્ચમાં જંગી વધારો થયો છે. ૨૦૦૯માં આ ખર્ચ ૧૫૦ અબજ ડોલરનો હતો. ચીન દૂરના અંતરેથી હુમલા કરવાની ક્ષમતા હાંસલ કરી રહ્યું છે, તેવી ચેતવણી પેન્ટાગોને આપી છે. ચીન વિશ્વમાં સૌથી વધુ સક્રિય ભૂમિ આધારિત બેલેસ્ટિક અને ક્રુઝ મિસાઈલ્સ કાર્યક્રમ ધરાવતું હોવાનું પણ તેના અહેવાલમાં જણાવાયું છે. ચીને અવકાશમાં લક્ષ્યો પર ત્રાટકવાની ક્ષમતા ધરાવતાં મિસાઈલ વિકસાવ્યા છે. અને તેના દળોને વૈશ્વિક પહોંચ મળે તે માટે પરંપરાગત અને આણ્વિક સબમરિનોનો કાફલો પણ વધારી રહ્યું છે. ચીન ૧૫૦૦ કિ.મી.થી વધુ અંતરની પ્રહાર ક્ષમતા સાથે એન્ટિશિપ બેલેસ્ટિક મિસાઈલ વિકસાવી રહ્યું છે, જે તેને વેસ્ટર્ન પાસિફિકમાં વિમાનવાહક જહાજો અને જહાજો પર હુમલાઓ કરવાની ક્ષમતા આપશે, તેમ પેન્ટાગોનના અહેવાલમાં જણાવાયું છે.